世外桃源海鮮酒家：南丫島逍遙遊

在復活節這個長假期的第一日, 舊同事們組織了一個南丫島行山團,可以親親大自然之外,還計劃到索罟灣食海鮮餐。 早上我地由中環搭船到榕樹灣再行去索罟灣, 中途也有坐低食碗豆腐花休息下, 經過一大段行山路徑。

到了索罟灣已經係下午四點的時候, 索罟灣的食店大部份都是海鮮飯店,成條街得好小人, 飯店的客人唔多,在出發前我地又無好好計劃去邊間食，所以都看看每間飯店的餐牌, 然後比較一下, 呢間的服務員十分殷勤, 就連老闆都親自出來向我地介紹菜色。

看看餐牌, 都係揀海鮮套餐為主, 一來價錢唔貴, 二來都可以食到幾款海鮮, 佢地係家庭式經營, 店員服務態度親切, 終於揀了海鮮套餐B。

黑胡椒海蝦: 份量足夠五至六人分享, 海蝦都算大隻, 外皮做得好脆, 海蝦沒有霉味, 是出乎意料的新鮮,黑胡椒份量落得啱啱好, 唔係太辣,小小辣夠惹味之餘卻沒影響海蝦的鮮味, 蝦肉鮮嫩爽口，有水準。

牛油焗龍蝦: 色澤鮮麗, 看看樣子便知是香口好吃，牛油香氣撲鼻而來,配料有洋蔥, 龍蝦殼炸好香脆, 龍蝦肉非常多又新鮮, 龍蝦肉啱啱好熟，味道鮮甜,以牛油焗香後更是滋味無窮,可惜份量略小了一點。

清蒸海上鮮: 條魚本身夠新鮮，而且蒸魚時間掌握得剛剛好，無過到火位, 魚肉鮮嫩, 魚肉係爽而不鞋,好有質感,兩斤不夠的魚肉質食落幾滑,同時魚味濃郁味道鮮鮮甜甜, 對新鮮魚來講, 我一向認為清蒸已經是最棒的吃魚方法。

豉椒蟶子: 蟶子肉是原條連殼的上, 是晚的蟶子真的算不上大條，雖然不算厚肉, 了豉汁去炒蟶子, 用豉椒炒是相當惹味, 可是吃起來香味不足, 好彩蟶子本身是新鮮的，每隻蟶子都鮮甜而肉質脆爽口, 也可以收貨。

豉椒本地蜆: 蜆隻唔算大隻，好彩蜆肉飽滿而且非常的肥美, 每隻蜆都已經開口, 證明粒粒蜆都是熟透, 用豉汁去炒蜆, 有强烈的香氣撲鼻, 每隻蜆都鮮嫩甜味, 肉質爽滑,最重要是蜆內走沙粒的功夫做得唔錯,入口全無沙粒, 小小辣味帶出蜆肉的美味, 十分惹味。

椒鹽焗鮮魷: 脆漿仲落左少少咖哩粉去吊味, 粉唔太會厚但做得好平均,剛剛好包得晒件鮮魷, 又唔會甩皮甩骨, 炒得香脆不油, 可口美味, 香香脆脆, 鮮魷唔老, 再配埋個甜酸醬，相當開胃, 最岩送啤酒啦。

食得海鮮套餐, 計落每位百幾蚊, 其實都預咗係將貨就價,水準一般, 不過最後食完海鮮, 都叫做滿足也。總括而言，食物味道中規中矩，服務好好, 而且對住個海環境一流，感覺好寧靜舒服。

等候時間: 0分鐘 (堂食)
用餐日期: 2014-04-18
是次消費: 每人約HK$170 (午餐)

世外桃源海鮮酒家
南丫島索罟灣第一街8號地下
29828128

759雲吞麵：759又有新搞作

759搞咗阿信屋之後, 又有新搞作, 就係搞埋飲食業, 開咗間雲吞麵鋪, 正式在8月16日開張, 當然要率先去試試。

間雲吞麵鋪開係長沙灣邨, 其實呢個鋪位上一手都係一間茶餐廳, 不過做咗好短時間就結業, 今次由759接手, 未開業已有傳媒報導, 大收宣傳之效, 就現場所見, 第一日開業已經大排長龍, 小第要排足一個鐘先有位。

店鋪的位置交通相當方便, 在長沙灣港鐵站出口附近，基本上由港鐵站行幾步就到,今次759雲吞麵都係走茶餐廳格局，鋪面面積唔算好大，鋪內大約有十幾張枱, 鋪中間是一排卡位, 再加部份圓枱, 枱與枱之間也有足夠空間, 唔會太逼, 比起一般茶餐廳, 裝飾方面是比較時尚。

食物主要集中係粉麵類、早餐、下午茶、三文治、飯類，選擇唔算太多, 價位同其他茶餐廳差不多, 今次點了餐廳主打的招牌雲吞麵加杯凍檸樂。

招牌雲吞麵份量較正常的大碗, 算大件夾抵食, 一大碗底麵, 雲吞總共五粒, 先試了湯底, 湯底唔太濃而偏淡, 雲吞幾大粒, 一嚿雲吞入口, 食落彈牙, 雲吞的餡料內的鮮蝦, 蝦味甜美，豬肉成份都有鮮味, 可惜雲吞味道真的偏鹹, 麵質爽滑同時沒有鹼水味, 作為店子的主打的招牌食物, 尚有改善空間。

飲品是凍檸樂，大大杯夠冰凍, 放上幾片檸檬, 在炎炎夏日, 可以有消暑作用。

總括而言, 以一間新開食店來講, 食物水準中等, 環境乾淨企理, 店員服務態度親切, 可能是第一日開業, 在運作上尚未暢順, 例如有出錯單和出菜太慢, 希望可以盡快改善。

等候時間: 60分鐘 (堂食)
用餐日期: 2014-08-16
是次消費: 每人約HK$38 (下午茶)

759雲吞麵
長沙灣長沙灣邨服務設施大樓地下1號舖

3669 6936

品尚橫濱拉麵：橫街內的橫濱拉麵

這晩做完功課之後，便順道到佐敦這間品尚吃拉麵，看過這店的食評，大部份的評價都不俗，價錢也算合理，最重要是不需要排隊排一兩個鐘才可吃一個拉麵。

這店的位置是在佐敦道和廟街交界，位於橫街內，是在城中熱店千鍋居對面，位置不算起眼，入到店內，是港式日本店，座位也不多，晚飯時間也只是十多位客人，很明顯是一間家庭形式經營的拉麵店，正是這樣，服務方面也令本人滿意，一座下來，老闆已經為我送上清水一杯。

這店以醬油湯底作招牌，所以橫濱醬油拉麵是熱賣的食物，本人也是點了這個。

拉麵的賣相唔錯，有葱花、叉燒、溏心蛋和大片紫菜，吃了一口湯底，湯身是香而濃，帶著醬油的鮮香味，也不會過鹹，叉燒質素不錯，入口鬆化甘香，肉質也嫩滑，麵條是粗身帶曲的，沒有鹼水味，煙韌爽口及彈牙，吸汁力也強，溏心蛋做得唔錯，蛋黃有流心，味道香甜。

總括這次到品尚橫濱拉麵的經驗，先講食物，這間的拉麵其實算唔錯，但是可能看了食評之後，對這店有一定期望，但食完之後，又發覺未去到預期的高水準，論價錢，是相當抵食，環境方面，也有改善空間，因為本人發覺這店，把雜物放在座位附近，有些不太整潔。

等候時間: 0分鐘 (堂食)
用餐日期: 2013-09-07
是次消費: 每人約HK$53 (晚餐)

品尚橫濱拉麵
佐敦廟街235號地下
2735 0808

Simplylife：銅鑼灣名店坊內的Simplylife

某天晚上收到名店坊公關公司的電郵通知, 原來銅鑼灣名店坊內有兩間新食店已經開業, 其中一間便是Simplylife, 是本人最愛餐廳之一, 一來大部份食評對Simplylife的評價都唔錯, 二來Simplylife是美心旗下的其中一個品牌, 有一定的水準, 所以我已經把這間Simplylife 加在我要去的餐廳名單內, 是日經過銅鑼灣便順道試試。

名店坊是銅鑼灣區一個好特別的地方, 在銅鑼灣閙市內卻自成一角, 有着一個富有寧靜和休閒的空間, Simplylife位處在加寧道的轉角位, 餐廳分開了兩部份。

其中一部份是餐廳外圍有戶外用餐區, 有部份座位可以望海，環境開揚, 見食客們休閒地享用美食,在這裡仿如置身園林之中, 是在鬧市中的一個綠洲。

另一部份是餐廳室內用餐區, 餐廳入門的位置擺放上幾個玻璃柜，一件件外表精美的蛋糕放置在內, 室內裝飾佈置也一如其他Simplylife 分店, 都是那樣高貴典雅。

看看餐牌, 午餐方面選擇也算多, 主菜有十多款可供選擇, 單選一款主菜連飲品為$78, 另外再加餐湯或沙律作前菜就要$88, 在銅鑼灣區以這樣質素的餐廳來講, 價格比我想像中低。

選了沙律作前菜，一客沙律加麵包, 蕃茄及車厘茄伴上沙律菜, 新鮮蕃茄入口多汁, 配合醋汁的酸味，相當醒胃, 作為前菜是最適合不過。

主菜點了燒鴨胸. 香草烤雜菜. 意大利黑醋汁, 賣相相當精緻, 一片片燒鴨胸整齊地放在碟上, 再淋上意大利黑醋汁, 配上香草烤雜菜作伴碟, 燒鴨胸外皮燒得香口,鴨胸肉帶有小許脂肪, 肉質嫩滑, 黑醋汁的酸味提升了鴨胸肉的味道, 水準之高, 極之對板!

飲品是凍柚子茶，大大杯夠冰凍, 放上一片大柚子, 清甜可口, 可以為炎炎夏日消消暑。

整體上頗為滿意，無論環境、食物、服務、價格都比預期中好, 尤其是環境方面最令本人滿意, 以後在銅鑼灣區又多了一間必到之地。

等候時間: 5分鐘 (堂食)
用餐日期: 2014-07-31
是次消費: 每人約HK$97 (午餐)

Simplylife
銅鑼灣加寧街13-15號地下A,C&D舖
2576 3808

古月 Ancient Moon：值得支持的誠意特色小店

最近在北角區開了一間新的特色小店, 主打星馬美食: 辣椒板麵和肉骨茶, 當中的辣椒板麵對小第來講是比較有新鮮感, 所以便盡快來試試。

店子真的比較隱蔽, 在書局街盡頭的一條小巷內，店內裝修簡單企理，找了個位置坐下之後，便看看餐牌有什麽午餐可供選擇, 其實選擇不多, 最後當然是點了辣椒板麵午餐。

樹仔葉湯: 原來個午餐係包一碗樹仔葉湯，是一碗清湯有二塊樹仔葉再加了墨魚丸及魚丸各一粒, 飲落帶小小胡椒辣味, 滲入了樹仔葉的甘香味道, 墨魚丸及魚丸也爽口彈牙。

辣椒板麵: 到了主角辣椒板麵上場, 整碗麵表面鋪滿了各種配料包括有半熟蛋、肉碎、炸江魚仔炸蒜粒等等, 食之前要將麵和配料撈埋一齊, 一只半熟蛋入口幾滑，炸得脆脆的江魚仔, 非常香口, 加上辣椒佐料的香辣味，夠惹味, 板麵的麵身爽口。

凍冰糖羅漢果冬瓜龍眼水: 夠凍冰, 是炎炎夏日的消暑佳品, 入口清甜, 清涼可口, 正正可以中和辣椒板麵的辣味。

這店子是一間有心、有誠意的特色小店，店員服務態度親切, 而且整體食物質素中上, 店子環境也算寧靜, 加上辣椒板麵是香港比較小有的特色食物，值得支持。

等候時間: 0分鐘 (堂食)
用餐日期: 2014-08-11
是次消費: 每人約HK$50 (午餐)

古月 Ancient Moon
北角錦屏街29號A舖地下 (七姊妹道書局街轉入)
5347 1766

御膳：御膳海鮮

我地呢一班理工舊同學，過一段時間，也會約埋一齊，聚一聚，大家的話題由家事、公事到私事也無所不談。這次聚會，有人提意想到這間御膳食海鮮，之前也很詳細的看過了餐單，也在大部份人同意下選了御膳的餐A, 這樣大家便約實了到御膳吃海鮮。

當日本人先到御膳，攞了位，坐底了，因為當天沒有蟶子，經大家再硏究後，終於改了做餐B。

麻辣鹵水大拼盆: 分別有豬大腸、兩款牛肚、鹵蛋及涼伴雞絲，雞絲用了雞翼來拆肉，味道唔錯，牛肚有金錢肚和草肚，豬大腸，也都爽口，雖說是麻辣，但實際上辣度適中，很易入口。

士多啤梨骨: 這個士多啤梨骨，幾創新，用士多啤梨來煮排骨，本人也是第一次嚐到，賣相唔錯，可惜份量太少了，我們一行八人，每人只有一件！整碟排骨伴上了士多啤梨肉，加上醬汁酸酸甜甜，很開胃，而且肉質鬆化。

金銀蒜蒸龍躉腩: 將龍躉腩起肉，再用金銀蒜蒸，龍躉腩鮮甜嫩滑，腩位是成條魚最滑的部份，而且已起肉，完全無骨，可以大啖大啖的吃。

椒鹽特大瀨尿蝦皇: 是特大條的瀨尿蝦皇，有接近一尺長一條，好新鮮，肉質肥厚，鮮甜爽口，而且啖啖肉，椒鹽味令到瀨尿蝦肉更加香口。

碧綠炒帶子: 用上大隻的帶子，用來炒菜，帶子爽口而肉厚，也相當鮮味，可惜也是份量太小了。

薑蔥炒大肉蟹: 份量十足的肉蟹，好新鮮，啖啖肉，肉質鮮甜，以薑蔥爆香後，鑊氣十足，相當美味。

砂鍋大魚頭豆腐湯: 湯濃而鮮甜味十足，用大魚頭來熬製，再加上豆腐，魚味亦十分香濃，本人也忍不住喝了兩碗。

招牌御膳炒飯: 這個炒飯，材料幾豐富有蝦仁、帶子粒、瑤柱、瘦肉，味道算中上，但比起本人在另一食店食過的炒飯，總是比了下去。

蟹油銀芽炒麵: 幼麵炒得乾身和夠火候，份量也算多，但吃不出有什麼蟹油味。

甜品: 是日甜係渣咋，用料有紅豆、綠豆、眉豆、雞尾豆、芋頭等，甜度適中，味道普通，本人對渣咋興趣只是一般。

整晚水準不俗, 值得一試。

等候時間: 0分鐘 (堂食)
用餐日期: 2013-08-19
是次消費: 每人約HK$312 (晚餐)

御膳
觀塘敬業街65-67號敬運工業大廈12樓F室
3575 9567
9029 1530

Berliner German Bar and Restaurant：長假期前要聚一聚

自從上次在屯門的餐廳吃過德國菜之後, 原來自己都有差不多一年時間沒吃了，在復活節這個長假期前兩位好友提議到Berliner吃德國菜, 既然好耐沒吃, 餐廳的評價也不錯, 便決定試一試。

在奧海城三期地下的 Berliner, 是有一定人氣的食店, 整間餐廳的環境和氣氛是頗佳, 向商場的一面相當開揚, 餐廳內側燈光比較昏暗，天花上的裝飾吊燈加上門口圓形的拱門, 令人彷如置身外國的情調, 座位算是寬趟舒適，無論是一大班人聚會, 或是三五知己飲杯嘢聊聊天, 也是一個合適的好地方。

本人最先到餐廳, 坐下了待應提醒我飲品在Happy Hour 時段有折扣, 所以先來點些飲品喝，本人點了啤酒，食德國豬手和肉腸，怎可以沒有啤酒，入口清涼，一路飲啤酒，一路食德國豬手，是一種享受。

秘製德國鹹豬手配香滑薯蓉及酸椰菜: 來到德國餐廳要食鹹豬手是常識吧, 鹹豬手本身也算大隻, 鹹豬手外皮燒得香脆, 最重要是親熱食，才可以享受到那種脆皮的感覺, 外皮下的肉味鮮嫩, 能夠做到皮脆肉嫩, 脂香四溢, 口感唔錯, 味道方面不會太鹹, 酸椰菜作為配菜之一又能減低油膩感覺, 薯蓉也可以充淡了一點鹹度, 水準不俗, 本人也密密吃了多塊。

肉腸拼盤配燒薯及酸椰菜: 是一個德國腸大併盤, 不過香腸拼盤的份量認真十足，最好三人以上享用, 拼盤裡有四種德國腸包括有Regensburger、Numberger、Cheese Krainer及Thuringer，深色的香腸份量十足, 餡料填得滿滿的而且偏向重口味, 最小巧而又調味恰到好處的紐倫堡香腸最適合個人口味，皮衣很薄和微韌，豬肉味濃郁, 非常鹹香惹味呢, 併盤內還有燒薯仔和酸椰菜，燒薯仔灑上香料, 非常香口, 酸椰菜的酸味也有消滯的作用。

煙三文魚伴德國黑麥包及薯仔沙律: 一碟四件, 擺放整齊, 賣相幾好, 幾精緻, 睇得出師傅在這道菜必定花過了心思去設計。把煙三文魚卷起放在一件薄身的黑麥包上, 再搽上沙律醬, 在三文魚表面放上一條小香草。煙三文魚的微鹹加上沙律醬的酸味，兩者味道配合得恰到好處, 可惜黑麥包的質感比較腍, 是一道開胃小吃。

整體而言, Berliner 的食物水準中上, 環境氣氛頗佳, 服務方面也滿意, 價格合理, 可惜地方真的比較嘈雜。

等候時間: 0分鐘 (堂食)
用餐日期: 2014-04-17
是次消費: 每人約HK$230 (晚餐)

Berliner German Bar and Restaurant
大角咀海泓道1號奧海城三期地下G18號舖
2148 5388