千鍋居：大家都滿意的飯局

早在一個月前舊同事們都想來一個飯局，大家聚一聚，心裡即時想起近日人氣高企的千鍋居，於是便訂了枱在這裡。因為大部份食評都對千鍋居給予非常高的評價，心裡面有很大的期望，亦非常期待今日的飯局。千鍋居位於佐敦道和廟街交界，而入口在廟街，由佐敦地鐵站步行大約五分鐘便到。

所以本人先去攞位，其他人在佐敦地鐵站等，然後一起到來，一行7人來一試千鍋居。餐廳地方相當寬敞，枱與枱之間有足夠的距離，沒有中式酒樓那樣枱貼枱的那種壓迫感，裝修亦相當簡單和優雅，當天星期五是全場滿坐，而且食客大部份也是斯文一族。

看看餐牌本人首先點了二道招牌菜，大良蟹雞鍋和花蛤蒸水蛋，其他人則點了五道菜。

大良蟹雞鍋: 果然係招牌菜，賣相好靚，用奄仔蟹配上鮮雞用，用料新鮮，用鍋上，要加熱一陣才可食用，加熱後，香噴噴，蟹肉鮮味，雞肉也相當滑，最後加埋個烏冬索晒所有鮮味。

花哈蒸水蛋: 另一道招牌菜係花蛤蒸水蛋，呢道菜嘅精髓在於蒸蛋的時間和火喉，水蛋蒸得啱啱好，所以好滑，嫩滑的水蛋加埋花哈的鮮味，簡直一流，而且好大碟，份量足

椒香桂花魚: 把整條桂花魚起肉，然後走油泡熟，魚肉很新鮮嫩滑，全部無骨，雖然有些紅椒在表面，其實只是微辣。

胡椒豬肚雞煲: 豬肚肉質好爽，雞件也嫩滑，加埋胡椒一起煲，味道濃，份量好多，我們一行七人，每人差不多有兩碗。

九制豬手: 呢道菜好特別和開胃，用話梅煮豬手，話梅的酸甜味加埋豬手煮得好入味。

啫啫通菜: 呢道菜就麻麻地，通菜唔係好新鮮，通菜稍為煮得老了，味道一般。

海鮮炒飯: 呢個睇落平平無奇的炒飯，其實本人相當欣賞，飯炒得乾身又唔會太硬，又唔會太油膩。

桂花蜜餞冰蕃茄: 呢個甜品個樣好得意，好似一朵花，用冰凍咗的蕃茄點桂花蜜來食好正，好清甜。

最後補充，原本點了招牌粉葛鯪魚豬肉老火湯，可惜已賣完，無緣一試。另外要讚一讚呢度個經理，很細心和有耐性地介紹每一道招牌菜色，唔會太硬銷亦顧及客人的口味。

總體來講，大家都滿意呢個飯局，大家都讚食物水準高，真的希望飲食界有多幾間好似千鍋居一樣水準高的食館。

等候時間: 0分鐘 (堂食)
用餐日期: 2013-07-26
是次消費: 每人約HK$180 (晚餐)

千鍋居
佐敦佐敦道26E號寶輝閣1樓
2377 2022